पैठण शहरात भटक्या कुत्र्यांचा वाढता त्रास — रेबीज लसीअभावी नागरिक हैराण!

पैठण शहरात गेल्या काही दिवसांपासून भटक्या कुत्र्यांची संख्या मोठ्या प्रमाणात वाढली आहे. रस्त्यावर, वसाहतींमध्ये आणि शाळांच्या परिसरात हे कुत्रे मुक्तपणे फिरत असून, नागरिक आणि विद्यार्थ्यांमध्ये भीतीचे वातावरण निर्माण झाले आहे.

दरम्यान, कुत्र्यांच्या चावण्याच्या घटनांमध्ये वाढ होत असताना, पैठण शासकीय रुग्णालयात रेबीज इंजेक्शन उपलब्ध नसल्याने जखमींना मोठ्या अडचणींना सामोरे जावे लागत आहे. उपचारासाठी नागरिकांना पिंपळवाडी येथील रुग्णालयात जावे लागते, मात्र तिथेही लस उपलब्ध नसल्यास थेट संभाजीनगर गाठावी लागते.

आरोग्य व्यवस्थेतील या दुर्लक्षामुळे जखमी नागरिकांवर अतिरिक्त आर्थिक आणि मानसिक ताण येत आहे. पैठण नगरपरिषद आणि आरोग्य प्रशासनाने या गंभीर समस्येकडे पूर्णपणे दुर्लक्ष केल्याचा आरोप नागरिकांकडून केला जात आहे.

स्थानिक नागरिकांनी प्रशासनाकडे तातडीने रेबीज लस उपलब्ध करून देण्याची आणि भटक्या कुत्र्यांवर नियंत्रण आणण्यासाठी तात्काळ उपाययोजना करण्याची मागणी केली आहे.