📰 मंठा तालुक्यात अवैध धंद्यांना उत्थान; पोलिसांच्या दुर्लक्षामुळे ग्रामस्थांमध्ये रोष…

मंठा तालुका व परिसरात विविध अवैध धंद्यांनी अक्षरशः थैमान घातले असून संध्या काळात तर या धंद्यांचा सुळसुळाट अधिक वाढताना दिसत आहे. अवैध वाळू वाहतूक, सट्टेबाजी, नशेचे व्यवहार अशा कोणत्याही प्रकाराला लगाम बसत नसल्याने ग्रामस्थ आश्चर्य व्यक्त करत आहेत.

तरुणांमध्ये जलद पैसे कमावण्याची मानसिकता वाढत चालली असून त्याचाच परिणाम म्हणून अवैध धंद्यांमध्ये तरुणांची वाढती गुंतवणूक चिंताजनक बनली आहे. सट्टयावर पैसे लावून मोठा नफा मिळण्याच्या लालसेने अनेक तरुण आकर्षित होत असून कर्जबाजारीपणातून नशेच्या आहारी जात आहेत. यातून अनेकांनी आत्महत्येचा मार्ग अवलंबल्याच्या घटनाही समोर आल्या आहेत.

दरम्यान, मंठा पोलिस ठाण्याच्या हद्दीत हे अवैध व्यवहार खुलेआम सुरू असतानाही संबंधितांकडून कोणतीही ठोस कारवाई होत नसल्याचा आरोप स्थानिक नागरिकांनी केला आहे. “हप्ते द्या आणि कोणताही धंदा करा” अशीच परिस्थिती निर्माण झाल्याने अवैध धंदे करणाऱ्यांना जणू मोकळे रान मिळाल्याचा सूर नागरिकांमध्ये ऐकू येत आहे.

पोलिस प्रशासनाने तातडीने लक्ष न दिल्यास परिस्थिती हाताबाहेर जाण्याची भीती व्यक्त केली जात असून ग्रामस्थांनी कडक कारवाईची मागणी केली आहे.