पैठण शहरात दोन दिवसांपासून पाणीपुरवठा ठप्प; नागरिक हैराण – मोटर दुरुस्ती सुरू, आज पाणी येणार…

पैठण – गेल्या दोन दिवसांपासून पैठण शहरातील पाणीपुरवठा पूर्णपणे ठप्प झाल्याने नागरिकांमध्ये तीव्र नाराजीचे वातावरण निर्माण झाले आहे. नाथसागर धरणाचे पाणी शहराला उपलब्ध असतानाही नळाला पाणी न येणे ही चिंतेची बाब ठरली आहे.

शहरातील काही भागात दर तीन दिवसांनी पाणीपुरवठा केला जातो. मात्र, यावेळी सलग दोन दिवस पाणी न आल्यामुळे नागरिकांची मोठी गैरसोय झाली. पाणी रात्री ११ वाजता येत असल्याने महिलांना मध्यरात्रीपर्यंत जागे राहून घरातील कामे करावी लागत आहेत. अनेक महिलांची झोपमोड होत असून त्यातून त्रास वाढत आहे.

पाणीपुरवठा विभागाचे अधिकारी किशोर नवगिरे यांना नागरिकांनी फोनद्वारे संपर्क साधला असता त्यांनी मोटर खराब झाल्यामुळे पाणीपुरवठा बंद झाल्याची माहिती दिली. मोटर दुरुस्तीचे काम सुरू असून आज पाणीपुरवठा सुरु केला जाणार असल्याचे त्यांनी सांगितले.

नागरिकांनी प्रशासनाकडे मागणी केली आहे की, पाणीपुरवठा नियमित करण्यात यावा, दुरुस्तीची कामे वेळेत पूर्ण करावी आणि नागरिकांना त्रास न देता पर्यायी व्यवस्था करावी.

पैठणसारख्या महत्त्वपूर्ण शहरात वारंवार पाणीपुरवठ्याच्या समस्येमुळे नागरिक त्रस्त झाले असून प्रशासनाने तातडीने स्थायी उपाययोजना करण्याची गरज भासत आहे.