जालना जिल्ह्यातील भाजपा जिल्हा परिषदेची पहिली उमेदवारी नितीन राठोड यांच्या नावावर शिक्कामोर्तब

प्रतिनिधी : गजानन माळकर, तालुका प्रतिनिधी, मंठा

मंठा (पेवा-नळडोह) : भारतीय जनता पक्षाच्या खोराड-सावंगी सर्कलमधील कार्यकर्ते व पदाधिकाऱ्यांचा भव्य मेळावा श्री संत जनार्दन महाराज संस्थान, पेवा-नळडोह येथे मोठ्या उत्साहात पार पडला. या मेळाव्याला माजी मंत्री तथा विद्यमान आमदार बबनराव लोणीकर, तसेच भाजपा प्रदेश सचिव राहुल लोणीकर यांची प्रमुख उपस्थिती लाभली.

मेळाव्यात बोलताना आमदार बबनराव लोणीकर म्हणाले की,

“नितीन राठोड हे प्रामाणिक, कार्यतत्पर आणि सर्वसामान्यांमध्ये मिसळून काम करणारे कार्यकर्ते आहेत. सर्कलमधील प्रत्येक गावात जाऊन जनतेशी संवाद साधला असता, एकमुखाने नितीन राठोड यांनाच जिल्हा परिषदेसाठी संधी देण्याची मागणी समोर आली. जनतेच्या या इच्छेला मान देत भाजपा जिल्हा परिषदेच्या पहिल्या उमेदवारीसाठी नितीन उत्तमराव राठोड यांच्या नावाची घोषणा करण्यात येत आहे.”

लोणीकर यांच्या या घोषणेनंतर सभागृहात टाळ्यांचा कडकडाट झाला. उपस्थित कार्यकर्त्यांनी जल्लोष करत नितीन राठोड यांचे भव्य स्वागत केले.

यानंतर माध्यमांशी बोलताना नितीन राठोड म्हणाले,

“लोणीकर साहेब व राहुल भैय्या यांनी माझ्यावर दाखवलेला विश्वास मी कायम राखेन. जनतेच्या सेवेत स्वतःला समर्पित करत विकासाच्या प्रवासात योगदान देण्याची संधी मला मिळत आहे. कार्यकर्ते, पदाधिकारी आणि जनतेच्या आशीर्वादाच्या बळावर या निवडणुकीत विक्रमी मतांनी विजय मिळवण्याचा संकल्प केला आहे.”

मेळाव्यात पंचक्रोशीतील कार्यकर्ते, पदाधिकारी आणि नागरिकांची मोठ्या संख्येने उपस्थिती होती.